Para se të ndryshonte diçka
Disa ditë më vonë, kisha një takim me një klient për një produkt që donim t’ia shisnim.
Kishim rënë dakord të bënim një demonstrim, duke e lënë pajisjen në ambientet e biznesit të tij.
Kishte më shumë se një muaj që punonim me këtë klient dhe i kishim premtuar se do të përpiqeshim t’ia plotësonim kërkesat.
Por nuk ishte një situatë e thjeshtë.
Programi që përdorte ishte specifik dhe kërkonte zhvillime të veçanta nga programuesit tanë.
Ishim nën shumë presion për ta vënë gjithçka në punë dhe për t’i plotësuar të gjitha kërkesat e klientit.
Dhe koha nuk ishte në anën tonë.
Madje, një mik imi, i cili na e kishte sugjeruar këtë klient, po na kërkonte ta merrnim pajisjen dhe ta hiqnim nga ambienti i tij.
Edhe ai ishte nën shumë presion dhe nuk donte që situata të përkeqësohej.
Nga ana tjetër, unë e dija se kishim bërë gjithçka që mundnim.
Pjesën që kishim marrë përsipër drejtpërdrejt e kishim përfunduar.
Kishin mbetur vetëm disa detaje teknike, të cilat kërkonin më shumë kohë nga grupi i zhvillimit.
Të nesërmen duhej të shkonim përsëri në takim.
Kthesa
Këtë herë vendosa të bëja diçka që e kisha bërë edhe më parë.
Vendosa t’i drejtohesha Perëndisë me një kërkesë konkrete dhe të besoja, duke u mbështetur te Fjala e Tij.
Vargjet ku po mbështetesha ishin 1 Gjonit 5:14–15.
Ato na mësojnë se, kur kërkojmë sipas vullnetit të Tij, Perëndia na dëgjon.
“Kjo është siguria që kemi përpara tij: nëse kërkojmë diçka sipas vullnetit të tij, ai na e plotëson:
Dhe nëse dimë se ai na i plotëson të gjitha ato që i kërkojmë, ne dimë se i kemi ato që i kërkuam atij.”
1 Gjonit 5:14–15
Fillova t’ia paraqisja Perëndisë kërkesat e mia një nga një.
Nuk kërkova vetëm që të arrinim ta shisnim produktin që kishim lënë për demonstrim.
Kërkova që, nëse ishte vullneti i Perëndisë, të na hapeshin edhe mundësi të tjera për punë të ngjashme në biznesin e këtij klienti.
Pastaj prita.
Çfarë kuptova
Të nesërmen shkuam në takim.
Para se të hynim, i thashë kolegut tim:
“Përgatitu për fitore.”
Por, sapo u ulëm përballë klientit, fjalia e parë që dëgjova ishte:
“U bëra gati ta merrja pajisjen dhe ta hidhja nga dritarja!”
Në atë moment mendova me vete:
“Mirë… Të presim dhe të shohim se si do të shkojë kjo bisedë.”
Filluam t’ia shpjegonim dhe t’ia demonstronim përsëri pajisjen dhe mënyrën se si funksiononte.
Kaluan rreth 30 minuta.
Pastaj u ulëm përsëri dhe filluam të diskutonim ofertat përkatëse.
Dhe ndodhi diçka që nuk e prisnim.
Çfarë ndryshoi
Klienti jo vetëm që i nënshkroi ofertat, por na kërkoi të vazhdonim edhe me pjesë të tjera të aktivitetit të tij.
Kishim hyrë në një takim ku fjalia e parë kishte qenë:
“U bëra gati ta merrja pajisjen dhe ta hidhja nga dritarja!”
Por dolëm prej tij me ofertat e nënshkruara dhe me mundësi të tjera pune.
Gëzimi ynë ishte i papërshkrueshëm.
Por, për mua, ajo ditë nuk ishte vetëm një kontratë e fituar.
Ishte një tjetër kujtesë e asaj që do të thotë t’i besosh Perëndisë përpara se të shohësh se si do të përfundojë një situatë.
Kisha mësuar diçka nga këto përvoja.
Nuk ishte vetëm çështja e asaj që po kërkoja.
Ishte çështja se ku po e vendosja besimin tim.
Ku mund të vazhdosh
KUPTO FJALËN → Si funksionon Mbretëria?